الشبكة نيوز : عشان تحافظ على البيئة.. مها عملت من سلك الماتور أشيك خواتم وإنسيالات كمان

نشأت مها في منزل يقدر الفن وإعادة التدوير، وكان دائماً والدها يهمس في أذنها بأن تعتمد على ذاتها ولا تنتظر يد العون من أحد وإن تنتهز كل فرصة لتعلم شيء جديد لأنها مع مرور الوقت سوف تحتاج ما تعلمته، لذلك تعلمت فن الخياطة لتصمم ماترتديه وتعلمت تصميم الإكسسوارات من أسلاك ماتور الكهرباء بدلاً من أن تتخلص منها في القمامة، حتى أصبحت تبهر بها زبائنها خلال مشاركتها في فعاليات معرض الزهور المقام خلال هذه الفترة بالمتحف الزراعى.

قالت مها سعد الدين من مدينة المحلة الكبرى، والتي كانت تعمل معلمة لغة فرنسية بإحدى المدارس لـ “اليوم السابع”، عن إتجاهها لتصميم الإكسسوارات من أسلاك ماتور الكهرباء بعد وصولها لسن التقاعد:”أنا أتولدت في بيت لقيت فيه ماكينة خياطة وحبيت الخياطة وأتعلمتها لدرجة إنى صممت فستان فرحى بنفسى وطرزته، وكمان حبيت تصميم الإكسسوارات وكنت الأول بشترى قطعة الإكسسوار وأعدل عليها لكن بعد كده أتعلمت تصميمها”.

تابعت :”أنا لقيت أسلاك النحاس بتاعت مواتير الكهرباء في بيت بابا لأنه كان شغال في شركة الكهرباء، وبدأت أصمم منها قطع إكسسوارات مختلفة من خواتم وإنسيالات لحد ماطورت من نفسى وعملت بيه كوليه وأنتيكات وميزة السلك النحاس إنه معدل أو مصنع من مادة عازلة مش هتتأثر بالمياه وبالتالي مش هتسبب حساسية وكمان هتفضل على لونها، وغير كده هحافظ على البيئة بدل ما أتخلص منها في القمامة”.

لم تكتفى مها بتصميم إكسسوارات تقليدية بل طورت من نفسها حتى تتميز عن الآخرين، حيث قالت :”طورت من تصممياتى وبقيت أرسم لوحات في الإكسسوارات وبزينها بالخرز وشاركت في معارض كتير، وفى المحلة السيدات الريفيات أكتر فئة بتقدر الإكسسوارات لأنها عارفة بتشترى حاجة هتعيش معاها العمر كله”.

وعن الطرق التي ساعدتها على تعلم تصميم الإكسسوارات، قالت :”اتعلمت تصميم الإكسسوارت من مقاطع فيديوهات على موقع اليوتيوب وكمان بستوحى منها أفكارى وببتكر أفكار خاصة بيا”.

ترى مها إنها حققت ما كانت تحلم به حيث قالت :”اللى كان نفسى فيه زمان عملته خلاص، يعنى كان طموحى إنى أعلم طلابى أن دراستهم مش نهاية الحياة وكنت بقولهم زى ماكان والدى بيقولى إنهم لازم يتعلموا كل إجازة حاجة جديدة زى تصميم الإكسسوارات ودلوقتى بدرب تصميم إكسسوارات وبقول لطلابى أتعلموا كل حاجة لأنها هتنفعكوا في يوم من الأيام”.

تصميمات أخرى

تصميمات مها سعد

تصميمات مها

خواتم من سلك ماتور الكهرباء

عقد من سلك الماتور

مها تصمم إكسسوار

مها سعد الدين